Өскемен қаласының әкімі Жақсылық Омар Прохладная және Әуежай ауданының тұрғындарымен кездесті.

Кездесу барысында тұрғындар шағымын жеткізіп, мәселелерін көтерді, деп хабарлайды Altaynews.kz тілшісі.
Былтыр аталған аудандағы Щербаков көшесіне жылу беру желілері тартылып, 151 пәтері бар 8 үй орталық жылу беру жүйесіне қосылды. Сонымен қатар, Бажов көшесіндегі сквер абаттандырылған. Биыл Щербакова көшесі 40/1 мекенжайынан Автобусная 355 көшесіне дейінгі аумаққа, Трубный тұйық көшесіне жарық беру бағаналары орнатылған. Биыл аталған ауданға қатынайтын 12-ші, 39-шы, 351-ші бағыттағы автобустар жаңартылған көрінеді.

Тұрғындар жиын барысында саяжай бірлестіктерінің аумағында жарық жоқ екенін, сондықтан кешке сабақтан қайтатын балалар мен жұмыстан қайтатын адамдар үшін қиындық туатынын айтып отыр. Одан өзге, тұрғындар 27-мектептің аумағының қоршалмағанына да наразы.

Сонымен қатар, аудан тұрғындары қаланың екінші шетіндегі КШТ ауданындағы емханалар мен медициналық орталықтарға барып қаралып тұратын ата- аналар мен балалар барын айтып, сол бағытта қатынайтын автобус шығаруын сұрады. Кей көшелердің тұрғындары тротуар салып, суық су құбырын ауыстыру керек екенін, қоқыс мәселесін, саяжай бірлестіктеріндегі электр желілерінің жағдайына назар аудару керек екенін айтты. Жаңа сквер салуды, ыстық су беруді, футбол алаңын салуды сұрады.