ҰБТ кезіндегі бейнежазбалар 31 қазанға дейін тексеріледі
Фото: Шартты сурет
Биыл ҰБТ аяқталғаннан кейін тестілеуге қатысты бейнежазбалар 31 қазанға дейін талданып, түсірілген видео тексерілмек.
Биылғы ҰБТ-ның жай-жапсары туралы Ұлттық тестілеу орталығының директоры Руслан Емелбаев мәлімдеді, деп хабарлайды Altaynews Қазақпарат агенттігіне сілтеме жасап.
– Тест тапсыруға кіргізу кезінде тиісті металл іздегіштер пайдаланылады. Бұл талапкерлердің қауіпсіздігін қамтамасыз етіп, ереже бұзуға және тыйым салынған заттарды (ұялы телефон, шпаргалка) алып өтуге жол бермеу мақсатында жасалады, – деді Руслан Емелбаев.
Дерек бойынша, калькулятор мен Менделеев кестесі компьютер экранында, ал негізгі ҰБТ-да химия бойынша тұздардың ерігіштік кестесі қағаз нұсқада ұсынылады.
– Тестілеу аяқталған соң әр пән бойынша жеке тақырыптық талдау болады. Балалар өз нәтижелерін, сондай-ақ қай тақырыптан қате жібергенін көріп, ҰБТ-ны екінші рет тапсыруға дайындығын жақсарта алады, – деді ҰТО басшысы.
ҰТО директоры тест тапсырғаннан кейін 30 минут ішінде апелляцияға өтініш беру мүмкіндігі бар екенін де жеткізді. Сертификатты апелляциялық комиссияның шешімінен кейін талапкердің жеке кабинетінен алуға болады.
– 2023 жылғы ҰБТ аяқталғаннан кейін, 31 қазанға дейін тестіге қатысты бейнежазбаларға талдау жасалып, түсірілген видео тексеріледі. Тыйым салынған заттарды пайдалану немесе ереже талаптарын орындамау фактілері анықталған жағдайда бұл талапкерлердің ҰБТ-ға қатысты нәтижелері жойылады, – деп атап өтті Руслан Емелбаев.
Оқи отырыңыз
