Қыркүйектің 8-13 аралығында Астанада V Дүниежүзілік көшпенділер ойындары жалауын желбіретеді. Дүбірлі додаға 80-нен астам елден 2 мыңнан аса спортшы қатысып, 21 спорт түрінен жүлдеге таласады деп күтіліп отыр. Олардың қатарында Түркия елі де бар, деп хабарлайды Altainews.kz тілшісі Kazinform агенттігіне сілтеме жасап.

Белгілі болғандай, Түркия Дүниежүзілік көшпенділер ойындарына 9 спорт түрінеy қатысуға ниет білдірген. Аталған елден 120-ға жуық спортшы топ жаруға барын салмақ.

Естеріңізге салсақ, соңғы рет Дүниежүзілік көшпенділер ойындары осыдан екі жыл бұрын Түркияның Изник қаласында өткен еді. Доданы жоғары деңгейде ұйымдастырған түріктер Астана қаласында да қызу тартыс болатынына сенімді.

Дүниежүзілік этноспорт конфедерациясының басқарма мүшесі Абдухади Турустың айтуынша, аталған жарысты өткізуде тәжірибе жинақтап алған Түркия қазақстандық әріптестеріне барынша қолғабыс көрсетіп жатыр.­

Дүниежүзілік этноспорт конфедерациясының тағы бір басқарма мүшесі Осман Басер мұндай іс-шаралар жастарды мәдениетті ғып тәрбиелеу үшін өте маңызды екенін атап өтті.

Айта кетейік, биылғы көшпенділер ойындарына Бруней-Даруссалам, Либерия, Венесуэла, Ирландия, Доминикан, Гамбия, Бруней, Эфиопия, Перу елінің спортшылары алғаш рет қатысады.