2025 жылғы сәуірде «Enbek» электрондық еңбек биржасында жұмыс берушілер мен жұмыс іздеушілердің белсенділігі айтарлықтай өсті. Бір ай ішінде платформада 97,5 мың бос жұмыс орны мен 115 мыңнан астам түйіндеме жарияланды. Бұл көрсеткіштер наурыз айымен салыстырғанда сәйкесінше 22% және 21%-ға артқан, деп хабарлайды Altainews.kz тілшісі.

Бос жұмыс орындарының құрылымында ең үлкен үлес орта білікті мамандарға тиесілі – 46%. Жоғары білімді мамандарға деген сұраныс 31%-ды, ал біліктілігі жоқ жұмысшыларға арналған ұсыныстар 23%-ды құрады. Бұл көрсеткіштер еңбек нарығында нақты маманданған, кәсіби тәжірибесі бар кадрларға деген тұрақты қажеттілікті көрсетеді.

Өңірлер арасында бос жұмыс орындарының ең үлкен өсімі Ақмола (+59%), Түркістан (+55%) және Абай облыстарында (+53%) байқалды. Түйіндеме саны бойынша да Абай өңірі алдыңғы қатарда – 47% өсім, одан кейін Батыс Қазақстан, Атырау және Павлодар облыстары тұр.

Ізденушілердің жыныстық құрылымы әйелдердің басымдығын көрсетеді – барлық түйіндеменің 57%-ы әйелдер тарапынан, ал 43%-ы ер азаматтардан түскен. Жас ерекшелігі бойынша 18–35 жас аралығындағы жастардың белсенділігі жоғары – олардың үлесі 45,6%-ды құрайды.

Сәуір айындағы жалақы күтулері де назар аударарлық. Ауылдық басқару саласындағы бас маман позициясы үшін 1,95 млн теңге, өңдеу өнеркәсібіндегі комплаенс маманы үшін – 1,1 млн теңгеге дейін сұраныс байқалды. Ал IT-дизайн саласындағы және басқарушы лауазымдарға үміткерлер жалақы ретінде 8–9 млн теңге аралығындағы табыс күтетінін көрсеткен.