Қазақстан мектептерінде 2024–2025 оқу жылы өз мәресіне жетіп келеді. Бұл туралы Үкімет отырысында Оқу-ағарту министрі Ғани Бейсембаев мәлімдеді. Министрдің айтуынша, биыл оқу жылын еліміз бойынша 3,9 миллионнан астам оқушы аяқтайды, деп хабарлайды Altainews.kz тілшісі.

Олардың ішінде:

• 391 мың бала бастауыш сыныпты (1–4 сыныптар),
• 364 мың оқушы негізгі мектепті (5–9 сыныптар),
• 217 мың түлек орта мектепті (11 сынып) бітіреді.
• «Алтын белгі» төсбелгісіне үміткерлердің үлесі бұрынғыдай 5%-дан аспайды.

Министрліктің мәліметінше, оқу жылы «Білім – Отаным» атты бірыңғай сынып сағатымен қорытындыланады. Ал мектеп бітірушілерге арналған «Мектебім, саған мың алғыс!» атты қоштасу шарасы 23 немесе 24 мамырда өтеді.

Оқушылар үшін ең маңызды күндердің бірі — аттестат тапсыру салтанаты — 18–20 маусым аралығында ұйымдастырылады.

9 және 11-сынып оқушылары үшін қорытынды мемлекеттік емтихандар 29 мамырдан 16 маусымға дейін өтеді. Бұл кезеңде білім сапасы мен оқу нәтижелері бағаланып, оқушылар келесі білім сатысына қадам баспақ.