Соңғы жылдары елімізде медицина қызметкерлеріне шабуыл жасау, күш қолдану оқиғалары көбейіп кетті. Тіпті кейбір дәрігерлер ауыр жарақат алып, жұмыс істеуге қабілетсіз болып қалған жағдайлар да бар. Осыған байланысты Денсаулық сақтау министрлігі Ішкі істер министрлігімен бірлесіп, медициналық мекемелерде тәртіп пен қауіпсіздікті күшейтуді қолға алды, деп хабарлайды Altainews.kz тілшісі.

Енді аурухана мен емханада қоғамдық тәртіп пен қызметкердің қауіпсіздігі жаңа талаптармен реттеледі. Қандай медициналық көмек көрсетілетініне, науқастар санына байланысты қауіпсіздік шаралары нақты белгіленеді.

Соңғы 5 жыл ішінде елімізде медицина қызметкерлеріне қарсы 160-қа жуық шабуыл тіркелген. Бұл – өте алаңдатарлық жағдай. Мемлекет енді дәрігерлердің қауіпсіздігіне басымдық беріп отыр. Себебі олар – адам өмірі мен денсаулығы үшін күн-түн демей еңбек етіп жүрген жандар. Сондықтан енді әрбір дәрігер, мейіргер, фельдшер өз жұмыс орнында өзін қауіпсіз сезінетін болады.

Дереккөз: Денсаулық сақтау министрлігі