Алматының "Қайрат" футбол клубы УЕФА Чемпиондар лигасының жалпы кезеңіндегі үй матчтарына билеттер сату тәртібін жариялады, деп хабарлайды Altainews.kz тілшісі.

Клубтың баспасөз қызметінің хабарлауынша, көптен күткен "Қайрат" — "Реал Мадрид" кездесуіне билеттер 23 қыркүйек күні сағат 17:00-де сатылымға шығады. Әр жанкүйерге бір ЖСН бойынша екіден артық билет рәсімдеуге рұқсат етілмейді. Мәліметтер сатып алу кезінде де, стадионға кірерде де мұқият тексерілмек.

Баға саясаты УЕФА-мен келісілген: Чемпиондар лигасындағы барлық үй ойындарына билеттердің құны 30 мыңнан 250 мың теңгеге дейін болады.