ШҚО ТЖД құтқарушылары SAMAL саябағында балалар үшін нағыз мереке ұйымдастырды. Жазғы демалыстың басталуына орай ТЖ қызметкерлері балаларға қауіпсіздік шараларын үйретуді ұйғарған.

Шараға қатысқан әр жеткіншек тоған арқылы өткелден өтіп, кедергілер жолағын еңсеріп, жәбірленушіге көмек көрсетіп, өрт сөндіру машинасын қолданып жалынды сөндіру мүмкіндігіне ие болды, деп хабарлайды Altaynews тілшісі.

Балалар ШҚО ТЖ департаментіндегі арнайы үйретілген құтқарушы иттермен ойнады.

Шараны ұйымдастыру барысында ҚР «Қызыл Жарты Ай» ШҚ  филиалының еріктілері қолдау көрсеткен.

Биыл оқыс оқиғалар кезінде 46 бала құтқарылған көрінеді.

ШҚО ТЖД мамандары каникул кезінде қырағылық танытып, балалардың қауіпсіздігіне ерекше назар аудару және ешбір жағдайда балаларды жалғыз қалдырмау керектігін еске салады. Ата-аналар балаларға қауіпсіздік ережелерін түсіндіруі тиіс.

Құтқарушылар көмегіне «112» телефон нөмірі арқылы жүгінуге болады.