ШҚО-да өрттің алдын алу үшін ТЖД қызметкерлері, орманшылар, полицейлер, жергілікті атқарушы орган өкілдерінен құралған 46 мобильді топ орман аумағында мониторинг жұмыстарын жалғастырып жатыр.

Алдын алу шаралары мен 370-тен астам рейд кезінде  өрт қауіпсіздігін бұзған 41 тұлға әкімшілік жауапкершілікке тартылды, деп хабарлайды Altaynews тілшісі.

Өрт қаупі кезеңі басталғанға дейін ШҚО ТЖД мамандары мен орманшылар халықпен, ауылдық елді мекендердің басшыларымен, ауыл шаруашылығының  өнімдерін өндірушілерімен 1338 кездесу өткізген. Мамандар шөпті өртеуге жол бермеу, өрт қауіпсіздігі ережелерін, оның ішінде орманда ережелерді бұзу қауіпті екендігі туралы нұсқау берген.

ШҚО ТЖД Мемлекеттік өрт бақылау басқармасының мамандары орман аймағында өрт әп-сәтте таралатынын, сондықтан оның алдын алу ең дұрыс шара екенін атап өтті. Желді ауа райында ұшқын ұшып, өрт шыршалардың салбыраған бұтақтарына тарап және ағаш басына дейін көтерілуі мүмкін. Мұндай өртті сөндіру қиынға соғатын көрінеді.

Өрт кезінде «101» немесе «112» нөмірлері арқылы дереу хабарласу қажет.