Шығыс Қазақстан облысында жыл сайын Қарттар күніне орай қазан айында «Мейірімділік айлығы» акциясы өткізіліп келеді. Игі дәстүр биыл да жалғасын таппақ. Бұл туралы Шығыс Қазақстан облысының жұмыспен қамту және әлеуметтік бағдарламаларды үйлестіру басқармасы мәлім етті.
Бүгінгі таңда ШҚО-да зейнеткерлік жасына толған 132 588 адам тұрып жатыр, деп хабарлайды Altaynews.kz сайты.

Облыста Қарттар күніне орай «Мейірімділік айлығы» акциясын өткізу жөніндегі облыстық іс-шаралар жоспары бекітілді. Осы жоспар аясында салтанатты іс-шараларды ұйымдастыру,  көп жасаған қарттар мен ҰОС ардагерлерін арнайы құттықтап, сыйлықтарын табыстау, мерекелік қайырымдылық түскі ас ұйымдастырып, ардагерлер мен оларға теңестірілген адамдарға жыл сайынғы скринингтік және профилактикалық медициналық тексерулер өткізу бойынша іс-шаралар жоспарланған.
Сонымен қатар еріктілер тобы ардагерлер мен жалғызбасты зейнеткерлерге қысқы отын дайындауға және аулаларын тазалауға көмек көрсетуді бастап кетті.

Айта кетейік, қоғамның, оның ішінде кейінгі буынның қарияларға деген сый-құрметін арттыруға бағытталған осындай акциялардың берері мол екені сөзсіз.