Алматы облысынан ШҚО-ға есірткі тасымалдаумен айналысқан адам ұсталды
Фото: ШҚО ПД баспасөз қызметі
Алматы облысынан ШҚО-ға есірткі тасымалдаумен айналысты деген күдік бойынша ер адам ұсталды.
Операцияның нәтижесінде 20 килограмнан астам марихуана заңсыз айналымнан алынды, деп хабарлайды Altaynews тілшісі.
ШҚО полицейлері күдіктіні Алматы облысындағы қала шетіндегі кенттердің бірінен ұстаған. ШҚО ПД дерегіне сенсек, 52 жастағы ер адам күдікті шығысқа аса ірі мөлшерде есірткі тасумен айналысқан.
Күдіктінің тұрғылықты жерін тінту кезінде сырты оралған, спецификалық иісі бар өсімдік тектес зат салынған екі полимерлі пакет тәркіленді. Жүргізілген сараптамаға сәйкес, тәркіленген зат жалпы салмағы 20 килограмнан асатын "кептірілген марихуана" есірткі екені анықталды.
— Ер адам есірткіні кейіннен облыс орталығының тұрғындарының арасында сатуды жоспарлаған. Қаскөйге қатысты ҚР ҚК-нің 297-бабы 3-бөлігі — аса ірі мөлшердегі есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу бойынша сотқа дейінгі тергеп-тексеру басталды, — деп жазылған ШҚО ПД хабарламасында.
Оқи отырыңыз
