ШҚО-дағы жаңа аудандарды дамыту жобасын Мәжіліс депутаттары қолдайды
Шығыс Қазақстан облысының әкімі Ермек Көшербаев ҚР Парламенті Мәжілісінің депутаттары Ұлықбек Тұмашинов және Ерлан Саировпен кездесті.
Өңір басшысы кездесуде облыстың әлеуметтік-экономикалық дамуының негізгі нәтижелері жөнінде айтты. Ал Мәжіліс өкілдері Риддер жылу электр орталығын қалпына келтірудегі Мемлекет басшысы мен Үкіметтің қолдауын, сондай-ақ жергілікті атқарушы органдардың іс-әрекетін жоғары бағалады, деп хабарлайды Altaynews.kz тілшісі.
Президент Қасым Жомарт Тоқаевтың 2023 жылғы 28 желтоқсандағы Жарлығына сәйкес, Шығыс Қазақстан облысының құрамында екі жаңа аудан құрылғаны белгілі. Кездесуде осыған қатысты ұйымдастыру мәселелері де талқыланды.
Қазіргі уақытта республикалық бюджеттен әкімшілік ғимараттарды салуға және жөндеуге, мемлекеттік мекемелердің материалдық-техникалық базасын нығайтуға, қызметкерлерді тұрғын үймен қамтамасыз етуге, қосымша инфрақұрылым мен коммуникациялар құруға қажетті қаражатты бөлу мәселелері пысықталуда.
Жаңа аудандарды республикалық бюджеттен қаржыландыру үшін ҚР Үкіметінің резервтерін пайдалану қағидаларына өзгеріс енгізу қажет көрінеді.