Мемлекет басшысы Қасым-Жомарт Тоқаев халыққа Жолдауында ауыл медицинасын дамыту жөнінде тапсырма берген. Бүгінгі таңда ауылдағы ағайын денсаулық сақтау саласындағы бұл оң өзгерісті анық сезініп отыр.

«Ауылдық денсаулық сақтауды жаңғырту» ұлттық бағдарламасы аясында 2023-2024 жылдары Шығыс Қазақстанда 36 медициналық нысан, оның ішінде жеті дәрігерлік амбулатория, екі фельдшерлік-акушерлік пункт, 27 медициналық пункт салынады, деп хабарлайды Altainews.kz тілшісі.

Былтыр жоспарланған 18 медпункттің бүгінде 17-сі (Тарбағатай ауданында - 6, Шемнайха ауданында – 1, Күршім ауданында – 5, Ұлан ауданында -5) пайдалануға берілген. Ал Глубокое ауданының Прапорщиков ауылындағы дәрігерлік амбулаторияның құрылысы биыл мамырда аяқталуға тиіс.

Сонымен қатар құрылысы биылға межеленген 18 медициналық нысанның 17-сінде мердігерлік ұйымдар анықталған. Бір медпункттің жобасы бойынша конкурс алдағы наурыз айында өтеді. Емдеу мекемелерінің құрылысы мен инженерлік инфрақұрылымына қаражат облыстық бюджеттен қарастырылған.

Ауылды жерлерде ашылып жатқан шағын медициналық мекемелер тұрғындар үшін өте қолайлы болғанын айта кеткен абзал. Мәселен, былтыр Ұлан ауданының Казачье ауылында заманауи медпункт ашылған. Енді жергілікті халық басы ауырып, балтыры сыздаса көрші ауылға немесе қалаға ат сабылтып бармайтын болды.