Бүгін Астанада Дүниежүзілік Денсаулық ұйымының ұйымдастыруымен және Денсаулық сақтау министрлігінің қолдауымен ДДҰ-ның адам папилломасы вирусына (АПВ) қарсы вакцинациялау мәселелері жөніндегі апталық республикалық семинар-тренингі басталды. 

Бұл шараға Ұлттық иммундау бағдарламаларының басшылары, жетекші клиницистер, республикалық және өңірлік деңгейдегі денсаулық сақтауды ұйымдастырушылар, сондай-ақ ШҚО медиктері де қатысып жатыр, деп хабарлайды Altainews.kz тілшісі.

Семинар қатысушыларына АПВ-ға қарсы вакцинаның қауіпсіздігі мен тиімділігі, онкологиялық аурулардың, әсіресе жатыр мойны обырының профилактикасы, вакцинациялауға деген сенім туралы жаңартылған ақпараты бар оқу модульдері ұсынылды.

Айта кетсек, иммундау - еліміздің халық денсаулығын сақтау саласындағы ұлттық саясаттың маңызды құрамдас бөлігі. АПВ-ға қарсы вакцинациялау адам папилломасы вирусымен зақымдану деңгейін және онкологиялық аурулардың, әсіресе жатыр мойны обырының (ЖМО) дамуын төмендетеді. Қазақстанда жыл сайын ЖМО-ның 1900-ге жуық жаңа жағдайы тіркеледі, бұл аурудан жыл сайын 600-ден астам әйел қайтыс болады. Бұл туралы семинарда айтылды.