Шемонаиха ауданының әкімдігінен хабарлағандай, ағымдағы жылы өңірде «Бастау Бизнес» жобасы бойынша кәсіпкерлік бастамаға жәрдемдесу жөніндегі шараларды ұйымдастыру және қаржыландыру қағидаларына сәйкес, бес адам оқудан өткен.

Аудан әкімінің орынбасары Данияр Уахитов шекаралық аймақта өз ісін бастаймын дегендерге барлық жағдай жасалып жатқанын мәлім етті, деп хабарлайды Altainews.kz тілшісі.

Әкімнің орынбасары мәлім еткендей, ауданда 40 тұрақты жұмыс орны құрылған, 126 адам бос жұмыс орындарына орналастырылып, 84 азамат қоғамдық ақылы жұмыстарға жіберілген. Жұмыс күші артық өңірлерден үш отбасы көшіріліп, үш қандас отбасы ауданға қоныс аударған.

Сол сияқты, өткен жылы ауданға дәрігерлік кадрлардың тапшылығын жою және медициналық мекемелер желісін нығайту мақсатында жеті дәрігер мен үш орта буын медицина маманы тартылғаны белгілі болды. Төрт маманға тұрғын үй беріліп, біреуіне көтерме жәрдемақы төленген. Ал ағымдағы жылы Волчанка ауылында медициналық пункт салу жоспарлануда.