ШҚО-дағы балалар мен жасөспірімдерге арналған спорт мектептерінің 7 қызметкері жалған дипломдарды пайдалана отырып жұмыс атқарған.

Бұл туралы Өңірлік коммуникациялар қызметі алаңында өткен брифингте ШҚО бойынша Сыбайлас жемқорлыққа қарсы қызметтің басшысы Денис Шакенов мәлімдеді, деп хабарлайды Altainews.kz тілшісі.

Спорт саласындағы сыбайлас жемқорлық тәуекелдеріне жүргізілген сыртқы талдау барысында басқа да деректер әшкере болды.

Айталық, 2021 жылы Өскеменде орналасқан волейболдан олимпиадалық резервтің мамандандырылған балалар-жасөспірімдер спорт мектебі оқу-жаттығу жиындарын өткізген, спортшыларға жатын орын мен тамақтану үшін іссапар төлемі ретінде 4,1 млн теңге аударылған. Алайда бұл жиындар Өскемендегі мектептің өз базасында өткен. Яғни, Өскеменде тұратын спортшыларға іссапар шығындарына төлем жасалған.

Ал, Жаңа Бұқтырма кентіндегі және Серебрянск қаласындағы спорт мектептерінде тәрбиеленушілердің қайталану фактісі және мемлекеттік сатып алу талаптарын бұзудың көптеген деректері анықталды.