Шығыстан Солтүстікке гуманитарлық көмек жөнелтілді (видео)
Бүгін Шығыс жұртшылығы тасқын судан зардап шеккен Солтүстік Қазақстан облысына гуманитарлық көмек жөнелтті.
Достық үйі мен өңірлік волонтерлер фронт-офисі шаһардан екі бекет ашып, бір апта ішінде 20 тоннаға жуық гуманитарлық көмек жинаған, деп хабарлайды Altainews.kz тілшісі.
Көмек көрсетуге жастар және волонтерлік ұйымдар, этномәдени бірлестіктер, кәсіпкерлер, жоғары оқу орындары мен облыс тұрғындары белсенді қатысқан.
- Апат айтып келмейді ғой. Бүгінде табиғаттың тосын мінезінен зардап шегіп жатқан өңірлерге аз да болса қол ұшын созу мақсатында «Жүректен жүрекке» атты акция бастаған болатынбыз. Бүгін Солтүстік Қазақстан облысына гуманитарлық көмек жіберіледі. Тұрғындардың көмегімен 20 тоннаға жуық азық-түлік, төсек-орын және басқа да қажетті заттар жиналды, - дейді ШҚО Қазақстан халқы Ассамблеясы «Teatr-all» жастар театрының көркемдік жетекшісі Назерке Айдынова.
Көмек жинауға облыстың түкпір-түкпіріндегі жанашыр жандарда атсалысқан көрінеді. Мәселен, Күршім және Алтай аудандарының тұрғындары азық-түлік, «Normal Nomad» ЖШС 5 тонна ұн жеткізген. Ал Халифа Алтай атындағы облыстық мешіт көмек беріп қана қоймай, гуманитарлық заттарды жеткізу үшін арнайы көлік шығарған.
- Қаржылай қолдау көрсеткен кәсіпкерлер де болды. Осы орайда қол ұшын созған барлық өңір жұртышылығына шын жүректен алғыс айтқым келеді. Бүгін Шығыстан көмек жөнелтіледі. Бірақ гуманитарлық көмек жинауды тоқтатпаймыз. Себебі төтенше жағдай жарияланған өңірлерге әлі де көмек керек. Оларға қолымыздан келгенше азық-түлік, дәрі-дәрмек жіберіп, қысылтаяң шақта демеу болуға тиіспіз. Жұдырықтай жұмылсақ ғана қиындықты еңсере аламыз, - деді штаб төрағасы Равиль Юнусов.
Оқи отырыңыз
