Өскемендік қолөнерші полиция департаментіне домбыра сыйлады – ШҚО
2018 жылдың 12 маусымында қабылданған қаулы бойынша шілде айының алғашқы жексенбісі Домбыра күні болып бекітілген. Ол ШҚО Полиция департаменті тәрбие және кадр жұмысы басқармасының аға инспекторы Аяулым Кәрімова үшін ерекше мереке саналады. Себебі әкесі өмірінің отыз жылын домбыра жасауға арнаған, деп хабарлайды Altainews.kz тілшісі Polisia.kz порталына сілтеме жасап.
Халқының салтын қадірлеген, ұлттық дәстүрді берік ұстанған, екі баланың әкесі болып отырған Бауыржан Кәрімов 1966 жылы Тарбағатай ауданының Құйған ауылында дүниеге келген. 1985 жылы Өскемен педучилищесін еңбек-сызу пәні мұғалімі мамандығы бойынша бітірген. 1987-1996 жылдары Тарбағатай ауданындағы Жамбыл ауылының мектебінде мұғалімі болған. 1997 жылдан бері Өскемендегі Жамбыл гимназиясында еңбек пәнінің мұғалімі.
Өнерлі азамат дәстүрлі аспаптар – домбыра, қобызбен қатар гитара, сандық, ертоқым, жиһаз жасап, қолөнерді 35 жылдан астам уақыт дамытып келеді. Мектеп оқушыларына домбыра жасауды үйретеді.
Бауыржан ағамыздың қолынан шыққан домбыраларды еліміздің мектептері, музыкалық білім мекемелері, сондай-ақ Түркия, АҚШ, Ресей сияқты мемлекеттерден сатып алған. Тіпті бір домбырасын облыс әкімі қызметін атқарған Бердібек Сапарбаев алған болатын. Қазір ол қалалық мұражайда сақтаулы.
Шебер қолөнермен қоса аңшылықты да меңгерген. Ат әбзелдерін сұраныс бойынша жасайды, тазыларды қолда ұстап, ат жаратып, бәйгеге қосады.
Аяулы жары Күлбанумен екі бала тәрбиелеп отыр. Ұлы Азамат жеке кәсіппен айналысса, қызы Аяулым полицияда қызмет етеді. Бұл отбасында ешкім де өнерден құр алақан емес.
Мереке қарсаңында ШҚО ПД бастығы Ерлан Омарбеков шеберді арнайы құттықтады.
Өз кезегінде шебер ШҚО ПД бастығына естелік ретінде домбыра тарту етті.