Денсаулық сақтау саласы – қоғамның басты назарында болатын әрі әрқашан дамып отыруды талап ететін маңызды сала. Қазіргі таңда халықтың денсаулығын сақтау және жақсарту мақсатында көптеген шаралар жүзеге асырылуда. Самар ауданында да денсаулық сақтау жүйесі халықтың медициналық қажеттіліктерін қамтамасыз ету үшін ауқымды жұмыстарды атқарып келеді.

Аудан тұрғындарына сапалы және қолжетімді медициналық көмек көрсету үшін дәрігерлік амбулаториялар, медициналық пункттер мен фельдшерлік-акушерлік пункттер жұмыс істейді. Сонымен қатар, ауданның денсаулық сақтау саласын одан әрі дамыту үшін бірқатар жоспарлы жұмыстар да атқарылуда, деп хабарлайды Altainews.kz тілшісі.    

Самар ауданында халыққа медициналық көмек көрсететін бір аудандық аурухана, бес фельдшерлік-акушерлік пункт, 14 медициналық пункт және дәрігерлік амбулатория бар. Бұл мекемелер аудан тұрғындарының денсаулығын қорғау және аурулардың алдын алу мақсатында күнделікті қызмет етеді. Мұндай медициналық мекемелердің барлығы халықтың денсаулық мәселелеріне жылдам жауап беру үшін және қажет жағдайда медициналық көмекті уақытында ұсыну үшін ұйымдастырылған.

2024 жылы ауданның кешенді даму жоспары аясында бірқатар медициналық мекемелерде жөндеу жұмыстары жүргізілді. Оның ішінде Бастаушы ауылындағы дәрігерлік амбулаторияға 63,2 миллион теңгеге күрделі жөндеу жүргізіліп, медициналық қызметтердің сапасын арттыруға бағытталған шаралар қолға алынды. Бұл жөндеу жұмыстары арқылы амбулаторияның заманауи үлгіде жұмыс істеуіне мүмкіндік беріліп, тұрғындар үшін қолайлы жағдайлар жасалды.

Аудандағы медициналық қызметкерлер саны да айтарлықтай жетілдірілген. Қазіргі уақытта аудан бойынша 25 дәрігер жұмыс істейді. Олардың 12-сі санатқа ие. Бұл дәрігерлердің арасында 6 жоғары санатты, 3 бірінші санатты және 3 екінші санатты маман бар. Мұндай тәжірибелі мамандар тұрғындарға сапалы медициналық көмек көрсетуде маңызды рөл атқарады.

Орта медициналық қызметкерлердің саны 104 адамды құрайды. Бұл топтың ішінде 59 қызметкер санатқа ие. Оның ішінде 54 қызметкер жоғары санатты, ал 5 қызметкер бірінші санатты болып табылады. Бұл көрсеткіш ауданның медициналық қызмет сапасын арттыру үшін үлкен маңызға ие. Дегенмен, медициналық кадрлармен қамтамасыз ету бойынша әлі де шешімін таппаған мәселелер бар.

Әлі де бірқатар дәрігерлік мамандықтар бойынша тапшылықтар байқалады. Аудандағы дәрігерлік кадр тапшылығы онколог, офтальмолог, дерматолог, анестезиолог мамандықтар бойынша анықталды.

Бұл мамандықтар бойынша қажетті дәрігерлердің жетіспеушілігі – ауданның денсаулық сақтау саласындағы ең өзекті мәселелердің бірі. Оларды шешу үшін мемлекеттік бағдарламалар мен шаралар жүзеге асырылуы керек. Қазіргі таңда бұл мәселеге қатысты жергілікті әкімдік пен денсаулық сақтау басқармасы өз деңгейінде жұмыстарды бастап та отыр. Мәселен, медициналық кадрларды тарту, оларға қолайлы жұмыс шарттарын жасау және біліктілігін арттыру курстарын ұйымдастыру сияқты шаралар қолға алынуы қажет.

Самар ауданындағы денсаулық сақтау саласы халықтың медициналық қажеттіліктерін қанағаттандыру мақсатында бірқатар маңызды қадамдарды жасауда. Ауданның медициналық мекемелері мен қызметкерлері тұрғындарға сапалы көмек көрсету үшін жұмыс істеп келеді. Алайда, кадр тапшылығы және медициналық мекемелердің кейбір мәселелері әлі де өз шешімін күтіп тұр. Оны шешу үшін аудандық және облыстық деңгейде тиімді шаралар қабылданып, медицина саласын дамытуға бағытталған жобалар іске асырылуы қажет. Бұл өз кезегінде аудан тұрғындарының денсаулығының жақсаруына және медицина қызметінің сапасының артуына септігін тигізері сөзсіз.

 Ержан Әбіш