Өскеменде өткен тәулікте жауған қардың салдарын жою жұмыстары қарқынды түрде жалғасуда. «Таза Өскемен» ЖШС мәліметінше, автожолдарды механикалық тазалау шұғыл басталып, қажетті техниканың бәрі жұмылдырылған. Тротуарлар мен жаяу жүргіншілер жолдарын тазалау жұмыстарына арнайы жұмысшылар тартылған, деп хабарлайды Altainews.kz тілшісі.

Қарды тазалаумен қатар, жолдардың көктайғақ болмауы үшін қажетті жерлерде тайғаққа қарсы материалдар себілуде. Қала тұрғындарына шыдамдылық танытып, тазарту жұмыстарына ықпал етуге шақыруда. Көліктерді көшелерден уақытында алып тастау және жеке аумақтарды тазалауға көршілерге көмек көрсету ұсынылады.

Қаланы қардан тазалау жұмыстары тәулік бойы жүргізілуде. Негізгі магистральдар мен тұрғын үй аулаларындағы қозғалысты қалпына келтіру мақсатында барлық күш жұмсалуда. Әсіресе қоғамдық көлік пен жедел қызметтердің жұмысына кедергі келтіретін учаскелерге ерекше назар аударылуда.

«Қазгидромет» мәліметі бойынша, 9-11 қаңтар аралығында ел аумағында циклон мен антициклондардың ауысуына байланысты ауа райы құбылмалы болады. Солтүстік пен шығыста қар жауып, боран соғуы ықтимал, ал батыста жаңбыр мен қар түріндегі жауын-шашын күтілуде.

Фото: «Таза Өскемен» ЖШС