Өскемендегі бірқатар көшелер уақытша жабылады
Фото: Тілеубек Шаяхмет
Облыс орталығындағы бірқатар көшелерде қар тазалау жұмыстарына байланысты жол жабылуы мүмкін.
10-11 ақпан күндері қалада жауған қалың қар шаhар тұрғындарына қолайсыздық тудырды. Коммуналдық қызметтер тәулік бойы күшейтілген режимде жұмыс істегеніне қарамастан, табиғаттың тосын мінезі көлік қозғалысын қиындатқаны рас, деп хабарлайды Altainews.kz тілшісі.
- Алдымен жаңбыр жауып, артынша қалың қар түсіп, көктайғақ болды. Коммуналдық қызметтер екі тәулік ішінде қаладағы көлік жолдарын қар құрсауынан босатуға тырысты. 600-ге жуық аялдама кешені тазартылды, жаяу жүргіншілер жолында жұмыс жалғасып жатыр, - деді қала әкімдігі.
Синоптиктер алдағы екі күн өңірде тағы қолайсыз ауа райы болуы мүмкін екенін болжады. Қазіргі уақытта барлық техника дайындалған. Қар тазалау жұмыстарына байланысты бірқатар көшелерде көлік қозғалысы уақытша шектелуі мүмкін.
- Қала тұрғындарынан түсіністікпен қарауды сұраймыз. Сондай-ақ алдағы күндері жол жиегіне көліктеріңізді қалдырмауларыңызды өтінеміз. Ол үлкен техникаларға кедергі келтіруі мүмкін, - делінген әкімдік хабарламасында.
Оқи отырыңыз
