Шығыс Қазақстан облысында 7 ақпан күні ауа температурасының төмендеуіне байланысты Өскемен қаласы мен барлық аудандарда оқушылар қашықтықтан оқыту форматына көшеді, - деп хабарлайды Altainews.kz тілшісі.  

Өскеменде -28 градус суыққа байланысты 0-4 сынып оқушылары онлайн оқиды. Семей қаласында -30 градустан төмен температура күтілуіне байланысты 0-9 сынып оқушыларына сабақ қашықтан өтеді.  

Аудандарда да аяз күшейіп тұр. Үлкен Нарын ауданында -31-33 градус, Катонқарағайда -30-32 градус, Күршімде -28-34 градусқа дейін төмендеп, 0-9 немесе 0-11 сынып оқушылары үшін онлайн оқу енгізілді. Марқакөлде -36 градусқа дейінгі суықта барлық оқушылар қашықтан оқытылады.  

Алтай ауданында -34-36 градусқа байланысты барлық мектеп оқушылары мен колледждің 1-2 курс студенттері қашықтан оқиды. Самар ауданында -30-32 градус аяз болжанып, 0-9 сынып оқушыларының сабағы онлайн форматқа ауысты. Шемонаиха ауданында -29-31 градус аязға байланысты 0-4 сынып оқушылары үшін дәстүрлі сабақ тоқтатылды. Ұлан, Зайсан, Тарбағатай аудандарында да ауа температурасы -28-35 градус аралығында өзгеріп, кейбір сынып оқушылары үшін онлайн оқу енгізілді.  

Төтенше жағдайлар қызметі тұрғындарға сақтық шараларын сақтауды, қажетсіз сыртқа шықпауды және жылы киінуді ескертеді.