Шемонаиха қаласында «Цифрлық әлемге қауіпсіз қадам» тақырыбында аймақтық ата-аналар конференциясы өтті. Облыстық білім басқармасының бастамасымен ұйымдастырылған жиынға ауданның түкпір-түкпірінен келген ата-аналар, мектеп өкілдері мен құқық қорғау органдарының мамандары қатысты, деп хабарлайды Altainews.kz тілшісі.

Қаладағы Островский атындағы №1 орта мектеп-гимназиясында өткен конференцияда негізінен балабақша мен мектеп жасындағы балалардың онлайн-кеңістіктегі қауіпсіздігі талқыланды. Айта кетерлігі, бұл жиын облыстық білім басқармасының «Біртұтас тәрбие» бағдарламасын іске асыру жөніндегі медиа-жоспары аясында ұйымдастырылды.

Конференция жұмысына Шемонаиха ауданының әкімі Дидар Кеңесбаев пен облыстық білім басқармасының басшысы Инесса Чернышёва қатысты.

Жиында бірқатар маман баяндама жасап, цифрлық қауіпсіздікке байланысты өзекті мәселелерді көтерді. Мәселен, Шемонаиха ауданының прокуроры Нұржан Қуатбеков «Цифрлық қауіпсіздіктегі ата-аналардың рөлі: ғаламтордағы қауіп-қатерді қалай анықтап, алдын алу керек?» тақырыбында баяндама жасады. Оның айтуынша, бүгінде интернеттің жас ұрпақтың санасы мен денсаулығына тигізетін әсері өте зор. Сондықтан жылдан-жылға ушығып бара жатқан бұл мәселені кешенді шешу қажет.

Ал Шемонаиха аудандық полиция бөлімі соңғы жылдары ғаламторда жасалатын қылмыстар санының күрт артқанын мәлімдеді. Осыған байланысты құқық қорғау органдарының өкілдері ата-аналарды алаяқтыққа тап болмас үшін балалардың цифрлық қауіпсіздігін қамтамасыз етуге ерекше мән беруге шақырды.

Жиында облыстық білім басқармасының Психологиялық көмек және қолдау көрсету өңірлік орталығының директоры Лилия Куземко «Ғаламтордағы психологиялық қауіпсіздік: баланың психикасын зиянды контенттен қалай қорғауға болады?» тақырыбында баяндама жасады. Ол ата-аналар тарапынан жиі қойылатын сұрақтарға жауап беріп, пайдалы кеңестер ұсынды.

Сонымен қатар «Örken» Шығыс Қазақстан өңірлік білім беруді ақпараттандыру және дамыту ғылыми-әдістемелік орталығының директоры Сергей Коваленко «Біртұтас тәрбие» бағдарламасын инновациялық технологиялар арқылы жүзеге асыру жөнінде баяндама жасап, цифрлық қауіпсіздікті арттыру бағытындағы жұмыстармен бөлісті.

Конференцияны қорытындылаған облыстық білім басқармасының басшысы Инесса Чернышёва жиында талқыланған мәселелер бойынша нақты ұсыныстар әзірленетінін атап өтті.

Түстен кейін конференцияға қатысушылар өзекті мәселелер бойынша секциялық жұмысқа қатысып, тәжірибе алмасты.

Нұржан Кенжеұлы
Фото-видео: Даниил Суворов