Облыс орталығындағы Ұстаздар үйінде халық мұғалімі атанған жаңашыл ұстаз Құмаш Нұрғалиевтің жүз жылдық мерейтойына орай «Шығармашылық, педагогикалық қызметтегі инновациялар» атты республикалық педагогикалық оқулар өтті. Іс-шараға әйгілі ұстаздың ұлдары Талант және Марат Нұрғалиевтер, қызы Гүл Құмашқызы, келіні Майгүл Нұрғалиева, сондай-ақ педагогтар династиясының өкілдері қатысты, деп хабарлайды Altainews.kz тілшісі.

Құмаш Нұрғалиұлының бастамасымен шалғайдағы Марқакөл ауданы, Боран ауылындағы мектеп 1970 жылдары-ақ компьютерлік сыныптармен жабдықталып, инновациялық білім беру үлгісіне айналды.

Оның мектебі оқушыларға тек дәстүрлі пәндерді ғана емес, техникалық және технологиялық білім негіздерін меңгеруге мүмкіндік берді.

Құмаш Нұрғалиевтің идеялары «Жұмысшы мамандықтары жылы» аясында бұрынғыдан да өзекті. Ол тек педагог қана емес, жергілікті билік органдарымен және жұмыс берушілермен тиімді ынтымақтастық орната білген нағыз менеджер болды.

Боран ауылындағы Құмаш Нұрғалиев атындағы гимназияның директоры Арман Болатов ұлы ұстаздың күнделіктерін зерттеп жүргенін айтады.

Ұстаздар әулетінің өкілі, Құмаш Нұрғалиев атындағы гимназияның ұстазы Майгүл Нұрғалиева бүгінде олардың 30-дан астам өкілі педагогика саласында еңбек етіп, жалпы еңбек өтілі 900 жылдан асатынын атап өтті.

Ұлы ұстаздың өмірінде жұбайы Әнипа Айкенқызы баға жетпес рөл атқарды. Ол Құмаш Нұрғалиевтің ұлы жоспарларын жүзеге асырудағы сенімді серігі болды.

Бүгінде Құмаш Нұрғалиевтің есімі еліміздің мыңдаған педагогтарын шабыттандырады. Оның жаңашыл идеялары мен білімге деген көзқарасы әлі күнге дейін өзекті болып қала бермек.

Фото: Нелли Петенева

Видео: Ермек Жиенбеков