Өскеменде Масленица мерекесі айрықша сән-салтанатпен тойланды. Жылдағы дәстүр бойынша қала тұрғындары мен қонақтары облыс орталығындағы Достық үйі – Қоғамдық келісім орталығының алдындағы алаңда жиналып, қысты шығарып салды, деп хабарлайды Altainews.kz тілшісі.

Масленица – славян халықтарының бағзы заманнан келе жатқан дәстүрлерінің бірі. Оны қысты шығарып салу мен көктемді қарсы алу мерекесі деп біледі. Бұл мерекені тойлау арқылы халық келер көктемнен зор үміт күтеді. Биыл да солай. Таңертеңнен Достық үйі – Қоғамдық келісім орталығының алдындағы алаңға халық көптеп жиналды.

Мерекеге келген жұртшылықты қаламыздағы ұлттық-мәдени орталықтар мен қоғамдық бірлестіктердің өкілдері құттықтап, бұл мейрамның басты мақсаты – өскелең ұрпақты достық пен бірлікке тәрбиелеу екенін атап өтті.

Рас, қыспен қоштасу – бұл ойын-сауық уақыты ғана емес, сонымен қатар мәдени мұра мен қоғамдық келісімнің маңызын айшықтайтын мереке. Осы ретте, Достық үйі – Қоғамдық келісім орталығының бұл бағытта атқарып жатқан жұмысын айрықша атап өткен жөн болар.

Мерекелік іс-шара барысында этномәдени бірлестіктердің өкілдері мен өңіріміздің танымал өнер ұжымдары құлақтан кіріп, бойды алар әсем ән шырқап, мың бұрала би биледі. Сонымен қатар мерекелік сауда-саттық ұйымдастырылды. Мейрамға жиналған қауым әртүрлі байқау мен ойындарға белсене қатысты. Бал құймақтардан дәм татты. Қолөнер шеберлері жасаған бұйымдардың көрмесін тамашалады. Осының бәрі халыққа керемет мерекелік көңіл күй сыйлағаны сөзсіз.

Мерекелік іс-шара соңында өскемендіктер мен қала қонақтары дәстүрлі қарақшыны өртеу рәсіміне қатысты.

Фото/видео: Евгений Щетников