Отандық «Патруль» сериалында басты рөлді сомдаған актер Білімжан Тұрсынов Ұлттық ұлан сапына қосылды. Қазіргі уақытта ол «Шығыс» өңірлік қолбасшылығына қарасты Өскемен қаласындағы 5518 әскери бөлімінде Отан алдындағы борышын өтеп жатыр, деп хабарлайды Altainews.kz тілшісі. 

Жетінші маусымы Семей қаласында түсірілген атышулы сериалдың белді актеріне отандық режиссерлер киноға түсуге ұсыныс жасаған. Алайда Білімжан алдымен мерзімді әскери қызметті өтеуді жөн санаған.

Білімжан әскерге дейін Абай атындағы Семей мемлекеттік қазақ музыкалық драма театрында актер болып қызмет атқарған. Ол «Сотанайдың соңғы үйленуі», «Әйел махаббаты» секілді спектакльдерде өнер көрсеткен. Голливуд жұлдызы, әйгілі актер Джонни Деппті үлгі тұтатын жас талант болашақта қазақ театры мен кино өнерінің жарық жұлдызы болуды мақсат тұтады.

«Шығыс» өңірлік қолбасшылығының баспасөз қызметі