«Шығыс» өңірлік қолбасшылығына қарасты 3514 әскери бөлімінде бір үйдің үш ағайындысы қызмет етеді. Ұлттық ұлан қатарына алғаш болып ортаңғысы қосылған. Қатардағы Еркебұлан Серікханов 2019 жылдан бастап әскери бөлімде граната атқыштың көмекшісі лауазымында келісімшарт бойынша қызмет атқарады. Бауырының әскери қызметіне қызыққан ағасы араға ай салып әскери бөлімнің сарбаз атқышы болып қызметке орналасады. Қатардағы Қуаныш Серікханов Курчатов қаласындағы әскери бөлімге тез үйренісіп кеткенін жасырмайды. Қазіргі таңда ол Ұлттық ұланның мүшесі ретінде жеке отбасын құрып үлгерген.

Біз Аягөз ауданының Мыңбұлақ ауылында тұрдық. Бала кезімізде Аягөз қаласына келгенде әскери техникаларды көріп таңданатынбыз. Сол кезде әкеме ержеткенде әскери қызметші болатынымды айттым. Ол маған ақ батасын берді. Өкінішке қарай, ол қазір арамызда жоқ. Анамыз үйдің кенжесімен әлі күнге дейін Мыңбұлақ ауылында тұрады. Бауырым мектепті тәмамдағаннан кейін оларды Курчатов қаласына көшіріп алу жоспарда бар, - дейді қатардағы Еркебұлан Серікханов.
Ағайынды жігіттердің үшіншісі Еламан мерзімді әскери қызметші. Ол да ағалары қызмет ететін Курчатов қаласындағы әскери бөлімде Отан алдындағы борышын өтеп жүр. Мерзімді әскери қызметін аяқтаған соң, қос ағасының ізімен келісімшарт бойынша әскери қызметші болып жұмысқа тұруды жоспарлап отыр. Мемлекет үшін маңызды нысандарды қорғайтын мекемеде қызмет ететін ағалы-інілі ұландар әрдайым қолдау көрсетіп, жауынгерлік қызметте жол нұсқаған әскери бөлім командиріне алғыстарын білдіреді.

«Шығыс» өңірлік қолбасшылығының баспасөз қызметі