Алтай ауданының мемлекеттік қызметкерлері Наурыз мерекесін ұлттық дәстүрге сай атап өтіп жатыр. Мерекелік іс-шаралар 14 наурыз – Көрісу күнінен басталды. Аудан әкімдігінде 120-дан астам мемлекеттік қызметкер еңбек етеді. Бұл күні олар барлығы ұлттық киім киіп, бір-бірін көктемнің келуімен құттықтады, деп хабарлайды Altainews.kz тілшісі.

 Наурыз мейрамының алдын ала дайындық аптасы басталды. 14 наурыз халық арасында Көрісу күні деп аталып, адамдар бір-біріне қонаққа барып, жылы лебіздерін білдіреді. Бұл күні әкімдік қызметкерлері де өзара құттықтап, жақсы тілектер айтты.

Ауданның мемлекеттік қызметкерлері Наурыз мейрамына арналған челленджге белсене қатысуда. Бастапқыда бұл бастама жаңа әрі қызықты үрдіс ретінде қабылданса, бүгінде дәстүрге айналып отыр.

Мемлекеттік қызметкерлер дәстүрлі киім үлгісін сақтай отырып, ресми стильді де жоғалтқан жоқ. Камзол мен жилеттердегі ұлттық ою-өрнектер, металл ілгектер – мерекелік сәннің бір бөлігі. Бұл аптада олар өзге де мерекелік іс-шаралар өткізуді жоспарлап отыр.

 Алтай ауданы әкімінің орынбасары Жанна Асқарова ұлттық нақыштағы киім кию дәстүрге айналғанын атап өтті. Оның айтуынша, мемлекеттік қызметкерлер осылайша ұлттық мәдениетке құрмет көрсетіп, Наурыз мейрамының қарсаңында мерекелік атмосфера қалыптастырады. Челленджге мыңнан астам бюджет саласының қызметкері қатысып жатыр. Бұл игі шара наурыз айының соңына дейін жалғасады.

Фото: Алтай ауданы әкімдігінен