«AMANAT» партиясының 2023-2027 жылдарға арналған сайлауалды бағдарламасы аясында Шығыс Қазақстан облысы Алтай аудандық ауруханасының көппрофильді стационарында жүргізілген күрделі жөндеу жұмыстары толық аяқталды, деп хабарлайды Altainews.kz тілшісі.

Күрделі жөндеу жұмыстарының жалпы құны шамамен 680 миллион теңгені құрады. Бұл жұмыстар травматология, хирургия, кардиология, анестезиология және реаниматология бөлімшелерін қамтыды. Сондай-ақ, ғимараттың шатырын жөндеуге 71 миллион теңге бөлінді. Барлық жөндеу жұмыстары ұлттық жоба аясында бюджет қаражаты есебінен жүзеге асырылды.

Жөндеу жұмыстары кезең-кезеңімен жүргізіліп, емдеу процесі тоқтатылмады. Жұмыстар барысында ғимараттың жылыту, су құбырлары мен электр жүйелері толығымен жаңартылып, жаңа санитарлық техника орнатылды.

Жөндеу жұмыстарының нәтижесінде аудан тұрғындарына сапалы медициналық қызмет көрсету мүмкіндігі айтарлықтай артты. Қазіргі заманғы санитарлық-техникалық жабдықтар мен жаңартылған бөлімшелер аурухана қызметінің тиімділігін жаңа деңгейге көтеруге ықпал етуде.