Шығыс Қазақстан облысында қардың жаппай еруі басталды. Өңірдегі су тасқыны қаупі бар аймақтар тұрақты тексеріліп, алдын алу шаралары жалғасуда. Тәулік бойы кезекшілік ұйымдастырылып, жағдай жедел штаб пен облыс әкімі Нұрымбет Сақтағановтың бақылауында, деп хабарлайды  Altainews.kz тілшісі. 

Ұлан ауданында әкімдік су басу қаупі бар аумақтарды тұрақты бақылауда ұстап отыр. Герасимовка ауылының маңында егістік алқаптарынан еріген су жиналып, ағыны күшейді. Қауіпті азайту үшін су бұру арналары тереңдетіліп, арналарды бекіту жұмыстары жүргізілді. Қазіргі таңда тұрғын үйлерге су кірген жоқ, үш ауладан еріген су сорылып шығарылды.

Облыс әкімі Нұрымбет Сақтағанов жағдаймен танысып, өзен арналары мен айналма каналдардың жағалауын бекіту, арықтарды тереңдету және тазалау бойынша нақты тапсырмалар берді.

Тарбағатай ауданында тасқын қаупі бар аймақтар, соның ішінде Маңырақ тауының күнгей беті, Қара Тоғам, Есенгелді және Барғана өңірлері тексерілді.

Алтай ауданында өзендердегі мұз қабаттары еріп, су деңгейі көтерілуде. Ауа райы мен гидрологиялық жағдай сағат сайын бақыланып отыр. Үлкен Нарын ауылындағы Алтайэнерго көшесінде шаруашылық құрылысының жанында еріген судың жиналуы байқалғанымен, тұрғын үйлерге қауіп жоқ. Жақын маңдағы дамба мен айналма каналдың арқасында су қауіпсіз бағытта ағуда.

Қазіргі уақытта канал тазартылып, су біртіндеп кетіп жатыр. Төтенше жағдайлар қызметі мен жергілікті атқарушы органдар жағдайды толық бақылауда ұстап отыр. Су тасқынына қарсы қорғау құрылыстары күшейтіліп, қажетті инертті материалдар мен арнайы техника дайындалған.