ШҚО тұрғыны интернет-алаяқтарға алданды: полиция ескерту жасады
pixabay.com
Шығыс Қазақстан облысында тұрғын интернеттегі хабарламаға сеніп, алаяқтардың арбауына түсті. Белгілі болғандай, әйел адам «несие рәсімдеуге көмектесеміз» деген желідегі жарнамаға сеніп, бейтаныс тұлғаның шотына ақша аударған. Уәде етілген қызмет орындалмаған соң, жәбірленуші полицияға жүгінуге мәжбүр болды, деп хабарлайды Altainews.kz тілшісі.
– Аталған дерек бойынша ҚР Қылмыстық кодексінің 190-бабы, 2-бөлігі («Алаяқтық») бойынша сотқа дейінгі тергеп-тексеру амалдары басталды. Жедел-іздестіру шаралары барысында күдіктінің жеке басы анықталды, – деп мәлімдеді ШҚО ПД баспасөз қызметі.
Полицейлер интернет-алаяқтықтың бүгінгі таңда кең таралған қылмыс түріне айналғанын ескертеді. Алаяқтар жалған несиелік қызметтерден бастап, жасанды интернет-дүкендер мен инвестициялық жобаларға дейін түрлі тәсілмен азаматтарды алдауға тырысады.
– Азаматтар бейтаныс тұлғаларға ақша аудармауы керек. Күмән тудыратын ұсыныстарға сенбей, ақпараттың рас-өтірігін мұқият тексеруге кеңес береміз. Сондай-ақ, несиені тек ресми қаржы ұйымдары арқылы рәсімдеген жөн. Ең бастысы – жеке және банк деректеріңізді бөгде адамдарға бермеңіз, – деді полиция өкілі.
Құқық қорғау органдары тұрғындарға алаяқтық фактілеріне тап болған жағдайда, бірден полицияға хабарласу қажеттігін еске салады.
Оқи отырыңыз
