Ұлы Жеңістің 80 жылдығы қарсаңында Шығыс Қазақстан облысының әкімі Нұрымбет Сақтағанов тыл еңбеккері Юрий Новолоцкийге мерейтойлық медаль табыстады. Марапаттау рәсімі Серебрянск қаласындағы әскери бөлімде өтті, деп хабарлайды Altainews.kz тілшісі.

Салтанатты шара 93678 әскери бөлімінде ұйымдастырылды. Бұл бөлім өз тарихын Екінші дүниежүзілік соғыстағы 316-гвардиялық миномет полкі ретінде бастаған. Жауынгерлер Курск түбіндегі шайқастарға, Днепр бойындағы ұрыстарға, Варшава мен Берлинді азат етуге қатысқан.

Соғыстан кейінгі кезеңде полк Германияда қызмет атқарып, кейін Шығыс Қазақстан облысына ауыстырылды. 1990-жылдары Қазақстан Республикасы Қарулы Күштерінің құрамына кірді.

Облыс әкімі тыл ардагері Юрий Новолоцкийге де құрмет көрсетті. Еңбек жолын бар болғаны алты жасында бастаған Юрий Иванович соғыс жылдарында «Вулкан» колхозындағы сүт-тауар фермасында жұмыс істеген. Алдымен малға қарап, кейін ұстаға көмекші болған.

Іс-шара барысында Қазақстан Қарулы Күштерінің әскери қызметшілері мен ардагерлері де Алғыс хаттармен марапатталды.

Елизавета Седых

Фото: Махаббат Ахметжанова

Видео: Евгений Щетников