22-29 маусым аралығында Шығыс Қазақстан облысында велоспорттан Қазақстан Республикасының Ұлттық чемпионаты өтуде. Бұл жарысқа еліміздің түкпір-түкпірінен келген 187 велошабандоз қатысып жатыр, деп хабарлайды Altainews.kz тілшісі.

Чемпионаттың басты ерекшелігі – бұл іріктеу кезеңі болып есептеледі. Мұнда үздік шыққан спортшылар қыркүйек айында Руандада өтетін Әлем чемпионатына жолдама алады. Жарыстың әділ өтуін халықаралық дәрежедегі төреші – Нидерландтан келген комиссар қадағалап отыр. Сонымен қатар, чемпионат нәтижелері халықаралық рейтингке енгізіледі.

ҚР Велоспорт федерациясының бас хатшысы Жетес Сүлейменов бұл чемпионат тек кәсіби спортшыларға ғана емес, жастар мен ерекше қажеттілігі бар спортшыларға да арналғанын атап өтті.

Жарысқа қатысқан астаналық велошабандоз Мұрат Күйтенов жастар арасындағы 40 шақырымдық критериум жарысында бірінші орынды иеленді.

Чемпионат аясында тағы да бірнеше қызықты жарыстар жоспарланған. Ең үздіктер осында анықталып, ел намысын қорғайтын команданың құрамы жасақталмақ.

Фото/видео: Евгений Щетников