Шығыс Қазақстан облысына республикалық бюджеттен бөлінуге тиіс 2,3 миллиард теңге қаржы түспей қалған. Оның бір бөлігін облыс өз қаражаты есебінен жапқанымен, кей жобаларды қаржы жетіспеушілігіне байланысты уақытша тоқтатуға тура келген, деп хабарлайды Altainews.kz тілшісі.

Облыстық қаржы басқармасының басшысы Светлана Большакованың айтуынша, 2025 жылдың алғашқы жартыжылдығының қорытындысы бойынша республикалық трансферттерді есептемегенде, облыс бюджетін игеру 99,3 пайызға орындалған.

Оның айтуынша, жылдық жоспар бойынша тек 30 пайыз трансферт қана келіп түскен. Ал игерілмеген қаржы көлемі – 1,8 миллиард теңге. Оның 255 миллионы – үнемделген қаражат.

Маусым айында қаржыландыру жоспарына өзгерістер енгізіліп, бұған дейін нақтыланған облыстық бюджетке тағы да түзету жасалған. Соның салдарынан кейбір бюджеттік бағдарламалар уақытша бұғатталып қалған. Нақтыланған бюджет 30 маусым – есептік айдың соңғы күні ғана рәсімделіп, қаржыландыру кеш ашылған. Бұл жағдай білім басқармасынан жіберілген қате мәліметтерге байланысты туындаған.

Сондай-ақ кей жобалар бойынша мердігерлер тарапынан жұмыстардың орындалу актілері ұсынылмаған немесе тауар жеткізілмеген. Мұның бәрі біраз жобалардың уақытша тоқтап қалуына себеп болған.

Елизавета Седых

Фото: ШҚО әкімдігі баспасөз қызметі