Енді медицина қызметкерлеріне күш қолданғандар немесе қорқытқан азаматтар қатаң жазалануы мүмкін. Бұл туралы ҚР Денсаулық сақтау министрі Ақмарал Әлназарова Үкіметтегі баспасөз мәслихатында айтты, деп хабарлайды Altainews.kz тілшісі.

Министрдің айтуынша, Президент тапсырмасына сәйкес, дәрігерлердің қауіпсіздігін күшейтуге бағытталған арнайы заң жобасы дайындалған. Құжат Бас прокуратура мен Ішкі істер министрлігінің алдын ала мақұлдауынан өтіп, қыркүйек айында Парламент қарауына жіберіледі.

Министр бұл өзгерістер дәрігерлердің кәсіби қауіпсіздігін қамтамасыз ету үшін аса маңызды екенін атап өтті.

Айта кетейік, соңғы жылдары дәрігерлерге қысым көрсету, қол көтеру, тіпті күш қолдану жағдайлары жиілеп кеткен. Бұған дейін Мемлекет басшысы Қасым-Жомарт Тоқаев медицина қызметкерлерінің құқығы мен қауіпсіздігін заңмен қорғау қажеттігін алға тартып, бұл бағытта нақты қадамдар жасау жөнінде тапсырма бергенін жазған болатынбыз.