Өскемендегі №1 қалалық емхананың ғимаратында жөндеу жұмыстары жүріп жатқаны белгілі. Науқастарға ыңғайлы болуы үшін жөндеу бірнеше кезең бойынша жүргізіледі. Осыған байланысты емхана басшылығы кейбір кабинеттер мен бөлімдердің жұмысына уақытша өзгерістер енгізілуі мүмкін екенін ескерткен болатын. Шығыс Қазақстан облысының қалалық және облыстық мәслихат депутаттары көшпелі отырыс аясында аталған мекемеде болып, жөндеу жұмыстарының барысымен танысты, деп хабарлайды Altainews.kz тілшісі.

Сапар барысында депутаттар жөндеу жүріп жатқан нысандарды аралап, медициналық көмектің қолжетімділігі мен сапасын, сондай-ақ материалдық-техникалық жарақтандыру мәселелерін талқылады.

Сапар қорытындысы бойынша депутаттар облыстық денсаулық сақтау басқармасына жөндеу жұмыстарын белгіленген мерзімде аяқтауды қамтамасыз етуді және жөндеу аяқталғаннан кейін жиһаз бен жабдықтарды жаңарту мәселесін қарастыруды ұсынды.

Осындай сапарлар – билік өкілдері мен медицина қауымдастығы арасындағы кері байланыс пен диалог орнатудың маңызды құралы.