Шығыс Қазақстанда экотуризм мен этнотуризмді дамытуға айрықша мүмкіндік бар. Соның бірі — Марқакөлде жүзеге асырылатын халықаралық туристік жоба, деп хабарлайды Altainews.kz тілшісі.

Бұл жоба Қытайдың ШҰАА аумағындағы Қанас көлі мен Марқакөлді бір туристік бағытпен байланыстыруды көздейді. Екі көлдің арасы шекара арқылы жақын орналасқан.

Жобада ең бастысы – табиғи ортаны сақтау мәселесі назарға алынған. Сондықтан курорттық аймақ Марқакөлдің дәл жағасында емес, 12–15 шақырым қашықтықта бой көтереді. Демалушылар үшін көлге арнайы көлік қатынасы ұйымдастырылады. Сондай-ақ, көл жағасында шабақ өсіру шаруашылығы ашылып, спорттық (әуесқой) балық аулау мүмкіндігі жасалмақ. Курорттық аймақта әртүрлі деңгейдегі қонақ үйлер, тамақтану орындары мен ойын-сауық нысандары салынуы жоспарланып отыр.