Өскеменде дәстүрлі тамыз конференциясы өтті. Жиынға өңір педагогтары, жоғары оқу орындарының ректорлары, ардагер ұстаздар, ата-аналар қауымы мен әлеуметтік серіктестер қатысты, деп хабарлайды Altainews.kz тілшісі.

Биылғы конференция «Білім келешегі: адал азамат, кәсіби маман» тақырыбында ұйымдастырылды. Шара барысында облыс әкімі Нұрымбет Сақтағанов ұстаздарға алғысын білдіріп, алдағы оқу жылындағы басым бағыттарды атап өтті.

Әкімнің айтуынша, биыл облыста білім беру инфрақұрылымын дамытуға 2,8 млрд теңге бөлінген. Бұл қаражат мектептерді жөндеуге, жаңа оқу кабинеттерін жабдықтауға, балалардың қауіпсіздігін арттыруға бағытталуда. Сонымен қатар, 2027 жылға дейін 21 мектепті жаңғырту жоспарланған.

Балабақшалар желісі де назардан тыс қалған жоқ. Өңір басшысы мектепке дейінгі тәрбие мекемелерінде орын тапшылығын азайтуға басымдық берілетінін атап өтті.

Сонымен бірге, конференцияда колледждер мен техникалық білім беру ұйымдарының әлеуетін күшейту, еңбек нарығына қажетті мамандарды даярлау мәселесі көтерілді. Әкімнің айтуынша, өңірдегі кәсіпорындармен бірлесе отырып, дуалды оқыту жүйесі кеңейіп келеді.

Өңір басшысы педагог мамандығына деген жастардың қызығушылығы артып келе жатқанын да атап өтті. Биылғы түлектердің шамамен 30%-ы ұстаздық жолды таңдаған.

Фото: Махаббат Ахметжанова

видео: Руслан Акматалиев