Өскемен жоғары политехникалық колледжі – халықаралық WorldSkills стандарттарына сай мамандарды даярлап, ірі өндіріс орындарымен тығыз әріптестік орнатқан оқу орны. Бүгін осы колледжде облыстық білім басқармасының бастамасымен «Жұмысшы мамандықтар жылы» аясында журналистерге арналған баспасөз туры өтті, деп хабарлайды Altainews.kz тілшісі.

Баспасөз сапары барысында қатысушылар колледждің мехатроника, электроника, ІТ, робототехника, жылу және баламалы энергетика бағытындағы жаңа шеберханаларын аралап көрді. Колледж басшылығы оқу орнының даму стратегиясын таныстырып, әлеуметтік серіктестер – «КЭМОНТ» АҚ және «ӨЭСК» АҚ-пен бірлескен жобалар жайлы айтты.

Колледжде оқу өндірістік ортаға барынша жақындатылған. Студенттер WorldSkills чемпионаттарына қатысып, демонстрациялық емтихандар арқылы кәсіби дағдыларын шыңдайды. Сондай-ақ, ірі кәсіпорындарда өндірістік тәжірибеден өту мүмкіндігі қарастырылған.

Колледж студенттері халықаралық аренада да табыстарымен танылып жүр. Олар WorldSkills Lyon 2024, Emirates Skills 2025, IEK ашық чемпионаттарына қатысып, жүлделі орындарға ие болды. Ал WorldSkills Shygys 2025 аймақтық чемпионатында колледж командасы І-орын алды.
Бүгінде оқу орнында 1100-ден астам студент 15 мамандық бойынша білім алуда. Түлектердің жұмыспен қамтылуы 100 пайызға жеткен. Студенттер жатақханамен қамтамасыз етіліп, әлеуметтік серіктестер базасында тәжірибеден өтеді.

Облыстық білім басқармасы басшысының орынбасары Әлима Ақылбек жұмысшы мамандықтарының маңызын ерекше атап өтті. 

Бұл мәселе Мемлекет басшысының Жолдауында да көтерілді.

Әлемдік технология – қазақстандық студенттерге

Колледждің құзыреттілік орталықтары LENZE, FESTO, CISCO, Schneider Electric, SIEMENS сынды халықаралық брендтердің технологияларымен жабдықталған. Бұл студенттердің білімін заманауи талаптарға сай жетілдіруге жол ашып отыр.
Баспасөз туры барысында журналистер студенттердің жаңа жобаларымен танысып, жас мамандарға кәсіби дамуға мүмкіндік беретін тәжірибе алаңдарын көрді.

Фото: Жібек Нұрахмет

видео: Жәнібек Ырысбай