Облыста ұйымдастырылған «WorldSkills Shygys 2023» өңірлік кәсіби шеберлік чемпионатының жеңімпаздары мен жүлдегерлерін марапаттау рәсімі өтті. Байқауда 29 негізгі машық бойынша 31 студент пен жас маман жеңімпаз деп танылды.

Чемпионат үш күнге созылды. Қатысушылар жұмысын бағалау үшін кәсіпорындардың жетекші мамандары мен өндірістік оқыту шеберлері шақырылған, деп хабарлайды Altaynews тілшісі.

Мәліметке сәйкес, WorldSkills қозғалысы жұмысшы мамандықтардың беделін арттыруға және танымал етуге бағытталған.

Өңірлік кезеңде жалпыкомандалық нәтиже бойынша 1-орынды Өскемен жоғары политехникалық колледжінің командасы иеленді. Ал 2-орын Өскемен көпсалалы технологиялық колледжінің командасына, 3-орын Риддер колледжі мен Өскемен құрылыс колледжінің командаларына бұйырды.

Облыста үздік атанған қатысушылар маусым айында Астана қаласында өтетін WorldSkills Kazakhstan-2023 республикалық чемпионатына қатысу құқығына ие болды.