Бір адам өмірін сақтап қалу – барша адамзатты құтқарғанмен тең. Ал мұны кәсіп еткен жанның жүрегінде қайсарлық, адалдық пен үлкен жауапкершілік болуы шарт. Осындай қасиеттерді бойына сіңірген азаматтардың бірі – Серік Байгаринов. Ол 17 жыл бойы өрт сөндіру мен төтенше жағдайға тап болған адамдарға көмек көрсетуге арнады. Қатардағы қызметкерден бастап қарауыл бастығына дейін өскен ол бүгінде жас мамандардың сеніміне ие тәжірибелі офицер атанды, деп хабарлайды Altainews.kz тілшісі.

Қарауыл бастығының жұмысы кәсіби білім мен жоғары дайындықты ғана емес, қиын жағдайда батыл шешім қабылдауды да талап етеді. Серік Байгаринов талай мәрте сындарлы сәттерде ерліктің үлгісін көрсетті. Оның басшылығымен ондаған адамның өмірі құтқарылып, өрттің ірі нысандарға таралуына тосқауыл қойылды.

Қызметтен тыс уақытта ол – үлгілі әке, сүйікті жар. Жұбайы Дианамен бірге екі ұл тәрбиелеп отыр. Салауатты өмір салтын ұстанатын офицер футболды жақсы көреді және осы әуестігін балаларына да дарытып, спортқа деген сүйіспеншілікті кішкентайынан сіңіріп келеді.