«Мәжіліс жанындағы Қоғамдық палата мүшелері парламентшілермен және сарапшылармен бірлесіп Сыбайлас жемқорлыққа қарсы іс-қимыл мәселелері жөніндегі заң жобасын және оған қатысты түзетулерді талқылады. Отырыс депутат Айдос Сарымның төрағалығымен, Мәжілістің вице-спикері Дания Еспаеваның қатысуымен өтті. Отырысқа қатысушыларды заң жобаларының нормаларымен Сыбайлас жемқорлыққа қарсы іс-қимыл агенттігі төрағасының бірінші орынбасары Ұлан Сарқұлов таныстырды. Оның ақпараты бойынша, түзетулер арқылы Сыбайлас жемқорлыққа қарсы саясат тұжырымдамасы ішінара іске асырылады. Негізгі заң жобасы алты бағытты қамтиды. Олардың ішінде - сыбайлас жемқорлардың жария тізілімін енгізу, пара ұсыну және уәде беру, сондай-ақ пара алуға келісу, сұрау немесе талап ету үшін қылмыстық жауаптылық және басқа да бағыттар бар, – деп хабарлады Мәжілістің баспасөз қызметі.