Болашақта Шығыс Қазақстан облысында оперетта театрын ашу көзделіп отыр. Сондай-ақ өңірдің шалғай ауылдарында кинозалдар ұйымдастыруға көңіл бөлінбек. Бұл туралы бүгін Өскеменде өткен зиялы қауым өкілдері мен мәдениет саласы қызметкерлерінің форумында айтылды.

Еске салайық, елімізде 21 мамыр мәдениет және өнер қызметкерлерінің күні болып бекітілген. Осыған орай, облыс орталығында аймақтық форум ұйымдастырылып, оған аудан-қалалардың әртістері, үздік өнер ұжымдары, кітапханашылар мен сала ардагерлері қатысты. Сала мамандарын облыс әкімі Ермек Көшербаев құттықтап, марапаттады, деп хабарлайды Altainews.kz тілшісі.

Облыстық мәдениет басқармасының басшысы Нұрболат Ахметжановтың айтуынша, кейінгі жылдары Шығыста өнер мен мәдениет салаларына айтарлықтай көңіл бөлінуде. Жетістіктер де жоқ емес. Мәселен, былтыр облыстық филармонияның «Алтай» халық биі ансамблі республикалық «Ұмай-2023» сыйлығының лауреаты атанды. Сонымен қатар жеті өнер ұжымы «Жыл үздігі-2023» атты облыс әкімі сыйлығымен марапатталып, әрқайсы 3,5 миллион теңгенің сертификатына ие болды. «Туған жер – алтын бесігім» акциясы қайта жаңғырды. Оған бүкіл ауданның өнерпаздары қатысып, халықтың зор қошеметіне бөленді. Былтыр облыста дәстүрлі «Шығыс салбурыны» фестивалі өтті. Оған алыс-жақыннан келген туристер қатысып, іс-шараның көрігін қыздырды. Дәл осындай акциялар туризмнің дамуына да зор септігін тигізері сөзсіз.

Әлбетте, ауылдық жердегі мәдениет үйлерін, клубтар мен кітапханаларды дамыту да аса маңызды міндеттердің бірі болып қала бермек. Белгілі болғандай, биыл бұл бағытқа, атап айтқанда, алты мәдениет нысанын жөндеуге облыстық бюджеттен 674,1 миллион теңге бөлінуге тиіс.

Бұған қоса, Ұлан ауданының орталығы Қасым Қайсенов кентінде Мәдениет және демалыс орталығын салуға 642,9 миллион теңге бөлінген.

Облысымызда кітаптарды цифрлық форматқа көшіру жұмыстары қолға алынып, бүгінге дейін 20 мыңнан астам кітап цифрланған. Бір сөзбен айтқанда, атқарылған жұмыс аз емес. Шешімін күткен түйткілдер де бар. Оларды форумға қатысқан зиялы қауым өкілдері ортаға салды. Әсіресе, кадр тапшылығы мен материалдық-техникалық қамтылуға қатысты сұрақтар бар. Облыс әкімі бұл мәселелер біртіндеп шешімін табатынын жеткізді.

Сонымен қатар аймақ басшысы кино саласына қатысты пікір білдірді.