Өскеменде Ұлы Отан соғысының ардагері Құрмат Рахимовтың ғасырлық мерейтойын атап өтті.

Мурал мен ескерткіш тақтаның салтанатты ашылуына  ҚР Ішкі істер министрінің орынбасары полиция генерал-майоры Айдар Сайтбеков, ардагерлер, ШҚО Полиция департаментінің қызметкерлері, Құрмат Рахимұлының туыстары мен жақындары қатысты, деп хабарлайды Altainews.kz тілшісі.

Бұл маңызды салтанатты шараның полиция күні қарсаңында өткеніне қуаныштымыз. Бүгін мен ардагердің туыстары мен жақындарына, ШҚО ПД қызметкерлеріне, жерлестер және қолдау білдірген баршаға алғыс білдіргім келеді, - деді полиция генерал-майоры Айдар Сайтбеков.

Құрмат Рахимов 17 жасында майданға аттанған. Ардагердің жауынгерлік жолы – Беларусь, Литва, Польшаның бүкіл картасын қамтиды, бірақ жас жігіт көптен күткен жеңісін Берлинде қарсы алды. Соғыстан кейін ол Каменец-Подольскідегі әскери училищені бітіріп, Түркіменстан мен Иран, Қазақстан-Қытай, кеңес-жапон және басқа шекаралардағы шекара бөлімдерінде қызмет еткен.

Демобилизациядан кейін 1965 жылы Өскеменге келіп, ұзақ жылдар бойы облыстық ІІБ бастығының орынбасары қызметін атқарған. 1981 жылы ішкі істер органдарында 16 жыл жұмыс істегеннен кейін зейнетке шыққан, алайда бүгінгі күнге дейін өз ісіне адал болып қала береді. Осы жылдар ішінде ол 6 генерал мен 60 офицерді тәрбиелеген. Ұлы Отан соғысы және ІІО ардагері II дәрежелі Отан соғысы орденімен, “Кенигсбергті алғаны үшін”, “Германияны жеңгені үшін”, “Жауынгерлік еңбегі үшін” медалімен және басқа да мерейтойлық наградалармен марапатталған.

Мерейтой иесі үшін фотосуреттері бар ретро-лента ұйымдастырылып, 1960-шы жылдардың стиліндегі жұмыс кабинетінің бұрышы дайындалған. Онда өңір басшысы Ермек Беделбайұлы Құрмат Рахимұлын құттықтап, Солжағалау саябағында ардагерлермен бірге солдат ботқасы мен соғыс уақыты туралы және Жеңіс күнін қалай атап өткенін жылы лебізімен еске алды.