Өскеменде облыстық жұмыспен қамту және әлеуметтік бағдарламаларды үйлестіру басқармасының жартыжылдық жұмысының қорытындысы шығарылды. Басқарма басшысы Альмира Мусинова өз баяндамасында жұмыспен қамтуға қатысты бағдарламалардың орындалуына тоқталып, облыстық көрсеткішке жетпеген  қала мен аудандардың салалық бөлімдерінің басшылары мен мансап орталықтары директорларының жұмысын сынға алды, деп хабарлайды Altainews.kz тілшісі.

Облыста бекітілген аймақтық  жұмыспен қамту картасы бойынша  жұмыссыздарды жеті бағыт бойынша жұмысқа орналастыру жоспарланған. Солардың бірі – Мемлекет басшысының тапсырмасы бойынша он мың жұмысқа қабілетті жандарға жүз жұмыс орнын ашу. Осы бағыт бойынша өңірде 11626 жұмыс орнын ашу жоспарланған, қазір Шығыста барлығы 3773 тұрақты жұмыс орны ашылды, немесе  жоспар 32 пайыз орындалды. Облыстық көрсеткішке жетпеген Риддер, Зайсан, Самар, Үлкен Нарын, Марқакөл аудандары.

Облыс бойынша субсидияланған 6786 жұмыс орны құрылу керек болса, қазіргі таңда  бар болғаны 4734 уақытша жұмыс орны  немесе 70 пайызы ғана құрылған. Осы жұмыспен қамтылған азаматтардың тек 77 пайызына ғана міндетті зейнетақы жарналары аударылған. Жоспарды орындау үшін жыл аяғына дейін тағы 2075 адамды жұмысқа алу қажет.

Жиынға аудан мен қалалардың жұмыспен қамту және әлеуметтік  бағдарламалар бөлім басшылары мен мансап орталықтарының директорлары, аумақтық әлеуметтік қызмет көрсету орталықтарының директорлары қатысты.