Шығыс Қазақстан облысында 1 шілдедегі жағдай бойынша 2 104 бүлдіршін балабақша кезегінде тұр. Соның ішінде Өскемен қаласы бойынша 1 593 бала кезекте тұр, деп хабарлайды Altainews.kz тілшісі.

Облыстық экономика және бюджеттік жоспарлау басқармасы басшысының міндетін атқарушы Динара Жұманова бұл мәселені шешу үшін бірқатар нақты жұмыс қолға алынғанын атап өтті.

Жылдың соңына дейін облыс орталығындағы 200 орындық бұрынғы балабақша ғимаратын нысаналы мақсатқа қайтару, 475 орындық 3 жеке балабақша ашу, 220 орындық 2 балабақша ғимаратын сенімгерлік басқаруға беру, профицит және жұмыс істеп тұрған мектепке дейінгі ұйымдарда қосымша  838 орын құру есебінен тағы 1593 жаңа орын ашу жоспарда бар.

Бұл жұмыстар 3 жастан 6 жасқа дейінгі балаларды  100 пайыз қамтуға, 2 жастан 6 жасқа дейінгі балаларды 98,7 пайыз қамтуға мүмкіндік береді.