Зайсанда 4 балабақша салынады – ШҚО
шартты сурет
Зайсан ауданында 2025 жылға дейін төрт балабақша салынады.
Бұл туралы ауданға жұмыс сапарымен барған облыстық білім басқармасының басшысы Инесса Чернышова айтты, деп хабарлайды Altaynews тілшісі.
Жалпы ауданда қазір 31 мектепке дейінгі ұйым жұмыс істейді. Оның он бірі – жекеменшік ұйым. Балабақшаға 1664 бала барады. 3 жастан 6 жасқа дейінгі балаларды мектепке дейінгі тәрбиемен қамту 100 пайызға тең.
«Шекара маңындағы ауданда балалар санының өсіп келе жатқаны байқалады. Енді мектепке дейінгі ұйымдарда жаңа орындар ашу мәселесі шешілуге тиіс. Бүгінге дейін үш жекеменшік балабақшада қосымша 150 орын ашылды. 2021 жылы жұмыс істеп тұрған төрт мектепке дейінгі ұйым 205 орынға кеңейтілді. 2025 жылға дейін ауданда 4 балабақша салынып, 295 орын ашылады», - деді Инесса Чернышова.
