Биыл Глубокое ауданының мәдениет нысандарын жөндеуге «Жұмыспен қамтудың жол картасы-2020» бағдарламасы бойынша республикалық бюджеттен 80 миллион теңге бөлінген, деп хабарлайды Алтайньюс тілшісі.

Осы қаражат есебінен жөндеу көрген нысандардың бірі – Прапорщиково ауылының Мәдениет үйі. Бұл ғимарат 1959 жылы салынған. Содан бері мұнда күрделі жөндеу жүргізілмеген. Сондықтан болар нысанның төбесінен су ағып, қабырғалары қопсып түсе бастаған.

– Ғимараттың 250 шаршы метрге жуық шатыры ауыстырылып, би залы мен фойе жөнделді. Ескі ағаш есіктердің орнына жаңасы салынды, – дейді мәдениет үйінің директоры Құмархан Ахметқалиев.

Оның айтуынша, кеңес заманынан бері қабырғалары сылақпен сыланып келген холл жөндеуден кейін әрі жарық, әрі жайлы бола түскен. Биыл ғимаратты қалпына келтіруге 4,5 миллион теңге бөлінді. 

Бірақ мәдениет үйінде шешілмеген мәселе әлі де бар. Соның бірі – көрермен залы. Құмархан Ахметқалиев келесі жылы да мәдениет саласының мәселесі назардан тыс қалмайды деп сенеді.