Ел Президенттігіне Жалпыұлттық социал-демократиялық партиясы атынан үміткер Нұрлан Әуесбаев Ақтөбе облысына сапармен барды.
Үміткер Бестамақ ауылының тұрғындарымен кездесті, деп хабарлайды Altaynews тілшісі.
Жұрт үміткерге кент ішімен өтетін Ақтөбе – Астрахань тас жолына байланысты шағымданды. Бүгінде жобаға сай кеңейтіліп жатқан бұл жол елді мекенді екіге бөліп отыр. Бұл тұрғындар үшін қиындық тудыруда. Біріншіден, жол бойында орналасқан үй тұрғындарын күндіз-түні тынбайтын көлік дыбысы мазалайды.
Екіншіден, тұрғындар үнемі жолды кесіп өтуге мәжбүр. Ауыл тұрғындарының шағымын тыңдаған үміткер адамдар қауіпсіздігі мемлекеттің басты міндеті екенін айтты.
Үміткер мәселені тез арада шешу керектігін белгіледі. Мұндай жағдай қайталанбауы үшін мемлекеттік басқару жүйесін реформалау қажет. Нұрлан Әуесбаевтың пікірінше, алдымен барлық деңгейдегі әкімдерді сайлауды енгізуді жеделдету қажет. Сонда ғана шенеуніктер халық алдында жауапкершілік сезініп, азаматтардың пайдасына шешім шығара бастайды.

Ләззат Қанатқызы