Панама қаласында робототехникадан дүниежүзілік «World Robot Olympiad» олимпиадасы өтті. Олимпиадаға 80-нен астам елдің атынан 10-19 жас аралығындағы оқушылар қатысқан.

Осы олимпиадада Қазақстанның атынан қатысқан үш команда жүлделі орыннан көрінді, деп хабарлайды Altaynews Egemen.kz сайтына сілтеме жасап.

Олимпиада роботтарды жобалау, бағдарламалау, инженерлік ғылымдар және басқа да инновациялық білім беру технологиялары саласында дарынды оқушыларды анықтау және қолдау мақсатында ұйымдастырылды.

Олимпиаданың қорытындысы бойынша отандық бір команда 2-орын,  екі команда 3-орын алды.

Олар:  

2-орын (күміс) «Future Engineers» категориясында астаналық 10-сынып оқушылары Аңсар Саурбаев және Амир Қарабаев;

3-орын (қола) «Robo Mission» категориясында Астана қаласының 8-9 сынып оқушылары Вагиз Дисембаев пен Жанарыс Капаров;

3-орын (қола) «Future Engineers» категориясында Қызылорда қаласының 11-сынып оқушылары Максим Усольцев пен Дінмұхамед Әбдиев.